• English
  • ພາສາລາວ

Emergency Ambulance: 020 59966111 020 2200 5563

Emergency Ambulance: 020 59966111 020 2200 5563
laoredcross-logo-circle

ອົງການກາແດງລາວ

Lao Red Cross

ອົງການກາແດງລາວ ຮ່ວມກັບສະຫະພັນລົດຖີບ ແຫ່ງຊາດ ຈັດກິດຈະກຳສະເຫຼີມສະຫຼອງ ວັນກາແດງສາກົນ ຄົບຮອບ 155 ປີ ໃນວັນທີ 12 ພຶດສະພາ 2018 ເພື່ອຫາລາຍໄດ້ຊ່ວຍຜູ້ປະສົບໄພພິບັດ ຢູ່ແຂວງໄຊຍະບູລີ ແລະ ແຂວງຊຽງຂວາງ.

May 15, 2018, ກິດຈະກຳ

ການຈັດ​ງານ​ສະ​ເຫຼີມ​ສະ​ຫຼອງວັນ​ກາ​ແດງ​ສາ​ກົນ ວັນ​ທີ 8 ພຶດ​ສະ​ພາ ປະ​ຈຳ​ປີ 2018 ແລະ ທັງ​ເປັນ​ການ​ລະ​ດົມ​ທຶນ ເພື່ອ​ຊ່ວຍ​ເຫຼືອ​ປະ​ຊາ​ຊົນ​ທີ່​ປະ​ສົບ​ໄພ​ພິ​ບັດຕ່າງໆ ໃນ​ໄລ​ຍະ​ຜ່ານ​ມາ​ນີີ້ ໂດຍ​ສະ​ເພາະ​ແມ່ນ​ປະ​ຊາ​ຊົນ ທີ່​ຖືກ​ຜົນ​ກະ​ທົບ​ຈາກ​ພາ​ຍຸ​ລະ​ດູ​ຮ້ອນ ໃນ​ເດ​ືອນ​ເມ​ສາ ທີ່​ຜ່ານ​ມາ ຢູ່​ແຂວງ​ໄລ​ຍະ​ບູ​ລີ ແລະ ​ລ່າ​ສຸດ ກໍ່​ຄື​ປະ​ຊາ​ຊົນ​ທີ່​ປະ​ສົບ​ອັກ​ຄີ​ໄຟ ຢູ່​ແຂວງ​ຊຽງ​ຂວາງ; ​ສະ​ນັ້ນ ອົງ​ການ​ກາ​ແດງ​ລາວ ຮ່ວມ​ກັບ​ສະ​ຫະ​ພັນ​ລົດ​ຖີບ ແຫ່ງ​ຊາດ ໄດ້​ຈັດ​ກິດ​ຈະ​ກຳ​ຂື້ນ ເພື່ອ​ກຽມ​ພ້ອມ​ຊ່ວຍ​ເຫຼືອ​ສຸກ​ເສີນແກ່​ປະ​ຊາ​ຊົນ​ທີ່​ປະ​ສົບ​ໄພ​ພິ​ບັດ​ຕ່າງໆ ພາຍ​ໃຕ້​ການ​ເປັນ​ປະ​ທານ ຂອງ​ທ່ານ ຄຳ​ຮຸ່ງ ເຮືອງວົງ​ສີ ປະ​ທານ​ອົງ​ການ​ກາ​ແດງ​ລາວ, ພ້ອມ​ດ້ວຍ​ຄະ​ນະ​ນຳ ອົງ​ການ​ກາ​ແດງ​ລາວ​, ​ຫົວ​ໜ້າ​ຫ້ອງ​ການ, ບັນ​ດາ​ຫົວ​ໜ້າ​ກອງ ແລະ ຮອງກອງພາຍ​ໃນ ​ອົງ​ການ​ກາ​ແດງ​ລາວ ​ແລະ ແຂກ​ເຂົ້າ​ຮ່ວມຈາກ​ພາກ​ສ່ວນ​ອ້ອມ​ຂ້າງ​ທີ່​ກ່ຽວ​ຂ້ອງ ແລະ ບັນ​ດາ​ນັກ​ກິ​ລາ​ປັ່ນ​ລົດ​ຖີບຈາກ​ສະ​ຫະ​ພັນ​ລົດ​ຖີບ ແຫ່ງ​ຊາດ ເພື່ອ​ລະ​ດົມທຶນ​ຊ່ວຍ​ເຫຼືອ​ຜູ້​ປະ​ສົບ​ໄພ​ສຸກ​ເສີນ ເຂົ້າ​ຮ່ວມ ລວມ​ທັງ​ໝົດ​ຈຳ​ນວນ 400 ກວ່າ​ທ່ານ ເກີນ​ຄາດ​ໝາຍ​ທີ່​ໄດ້​ກຳ​ນົດ​ໄວ້.

ຈຸດ​ປະ​ສົງ ຂອງ​ງານ​ໃນ​ຄັ້ງ​ນີ້ ເພື່ອ:

  1. ເພື່ອ​ສະ​ເຫຼີມ​ສະ​ຫຼອງວັນ​ກາ​ແດງ​ສາ​ກົນ 8 ພຶດ​ສະ​ພາ ປະ​ຈຳ​ປີ 2018, ບົນ​ເນື້ອ​ໃນ​ພື້ນ​ຖານ​ຂອງວັນ​ກາ​ແດງ​ສາ​ກົນ ຄື: “ ກາ​ແດງ ເພື່ອ​ທຸກ​ຄົນ ” (Everywhere4everyone) ຊຶ່ງ​ຮູບ​ແບບ​ຂອງວັນ​ກາ​ແດງ​ສາ​ກົນ ໃນ​ປີ 2018 ແມ່ນ “ຮອຍ​ຍິ້ມ​” (Smile) ຊຶ່ງ​ສະ​ແດງ​ເຖິງ​ຮອຍ​ຍິ້ມ​ຂອງ​ຜູ້​ໃຫ້​ແລະ ຜູ້​ຮັບ ຊຶ່ງ​ເປັນ​ຮອຍ​ຍິ້ມ ແຫ່ງ​ການ​ແບ່ງ​ປັນ.
  2. ເພື່ອ​ລະ​ດົມ​ການ​ບໍ​ລິ​ຈາກ​ຂອງ​ສັງ​ຄົມ ໄປ​ຊ່ວຍ​ເຫຼືອ​ປະ​ຊາ​ຊົນ​ທີ່​ປະ​ສົບ​ໄພ​ພິ​ບັດ​ຕ່າງໆ ເຊັ່ນ: ປະ​ຊາ​ຊົນ​ທີ່​ປະ​ສົບ​ພາ​ຍຸ​ລະ​ດູ​ຮ້ອນ ໃນ​ເດືອນ​ເມ​ສາ ຜ່ານ​ມານີ້ ຢູ່​ແຂວງ​ໄຊ​ຍະ​ບູ​ລີ ແລະ ປະ​ຊາ​ຊົນ ທີ່​ປະ​ສົບ​ອັກ​ຄີ​ໄຟ ໃນ​ອາ​ທິດ​ທີ່​ຜ່ານ ຢູ່​ແຂວງ​ຊຽງ​ຂວາງ ເປັນ​ຕົ້ນ.

ປັດ​ຈຸ​ບັນ ມີ​ຜູ້​ປະ​ສົບ​ໄພ​ພິ​ບັດ ຈາກ​ພາ​ຍຸ​ລະ​ດູ​ຮ້ອນ ທີ່​ສ້າງ​ຄວາມ​ເສຍ​ຫາຍ​ໃຫ້​ແກ່​ເຮືອນ​ຊານ ແລະ ພື້ນ​ທີ່​ການ​ຜະ​ລິດຂອງ​ປະ​ຊາ​ຊົນ ຈຳ​ນວນ​ຫຼວງ​ຫຼາຍ ແລະ ກວມ​ຢູ່​ຫຼາຍ​ເຂວງ​ຂອງ​​ລາວ, ນອກ​ຈາກ​ໄພ​ພິ​ບັດ ຈາດ​ພາ​ຍຸ​ລະ​ດູ​ຮ້ອນ​ແລ້ວ ປັດ​ຈຸ​ບັນ​ກໍ່​ຍັງ​ເກີດ​ມີ​ອັກ​ຄີ​ໄຟ ຊຶ່ງ​ສ້າງ​ຄວາມ​ເສຍ​ຫາຍ​ໃຫ້​ແກ່​ປະ​ຊາ​ຊົນ​ຢ່າງ​ໜັກ​ໜ່ວງ ຊຶ່ງ​ເຂາ​ເຈົ້າ​ເຫຼົ່າ​ນັ້ນ ກໍ່​ຍັງ​ຄົງ​ຕ້ອງ​ການ ການ​ແບ່ງ​ປັນ ແລະ ນ້ຳ​ໃຈ​ໃນ​ການ​ຊ່ວຍ​ເຫຼືອ ຈາກ​​ທຸກ​ພາກ​ສ່ວນ ເພື່ອ​ແກ້​ໄຂ​ຊີ​ວິດ​ການ​ເປັນ​ຢູ່ ຂອງ​ເຂົາ​ເຈົ້າ​ໃນ​ໄລ​ຍະ​ສຸກ​ເສີນ ສ້າງ​ເງື່ອນ​ໄຂ ໃຫ້​ເຂົາ​ເຈົ້າ​ມີ​ກຳ​ລັງ​ໃຈ ໃນ​ການ​ສືບ​ຕໍ່​ດຳ​ລົງ​ຊີ​ວິດ​; ຊຶ່ງ​ປັດ​ຈຸ​ບັນ​ອົງ​ການ​ກາ​ແດງ​ລາວ ໄດ້​ສຸມ​ໃສ່ການ​ລະ​ດົມ​ແຫຼ່ງ​ທຶນຈາກ​ທຸກ​ທ່ານ ທີ່​ມີ​ຈຸດ​ປະ​ສົງ​ຢາກ​ໃຫ້​ການ​ຊ່ວຍ​ເຫຼືອ​ຜູ້​ປະ​ສົບ​ໄພ​ພິ​ບັດ ແລະ ແບ່ງ​ປັນ​ຊັບ​ສິນ​ຂອງ​ທ່ານ ໃຫ້​ແກ່​ປະ​ຊາ​ຊົນຜູ້​ປະ​ສົບ​ໄພ ໂດຍ​ອົງ​ການ​ກາ​ແດງ​ລາວ ຈະ​ເປັນ​ສື່​ກາງ ໃນ​ການ​ລະ​ດົມ​ຂົນ​ຂວາຍ ເພື່ອ​ປະ​ມອບ​ໃຫ້​ປະ​ຊາ​ຊົນ ຜູ້​ປະ​ສົບ​ໄພ ທີ່​ຍັງ​ຕ້ອງ​ການ ການ​ຊ່ວຍ​ເຫຼືອ ຈາກ​ພວກ​ເຮົາ​ທຸກ​ຄົນ.

​          ສາ​ມາດ​ບໍ​ລິ​ຈາກ​ໄດ້ອົງ​ການ​ກາ​ແດງ​ລາວ ບໍ່​ວ່າ​ຈະ​ເປັນເງີນ, ເຂົ້າ​ສານ, ອາ​ຫານ​ແຫ້ງ, ເຄື່ອງ​ນຸ່ງ​ຫົ່ມໃໝ່ ຫຼື ມື​ສອງ ທີ່​ສາ​ມາດ​ນຳ​ໃຊ້​ໄດ້, ເຄື່ອງ​ໃຊ້​ຄົວ​ເຮືອນ​ທີ່​ຈຳ​ເປັນ​ຕ່າງໆ ເພື່ອ​ໃຫ້​ເຂົາ​ເຈົ້າ​ສາ​ມາດ​ແກ້​ໄຂ​ຊີ​ວິດ​ການ​ເປັນ​ຢູ່​ຂອງ​ເຂົາ​ເຈົ້າ​ໄດ້​ໃນ​ຊ່ວງ​ໄລ​ຍະ​ສຸກ​ເສີນນີ້.

ບໍ​ລິ​ຈາກ​ໄດ້​ທີ່: ໂທ​ລະ​ສັບ:  021-253014;

Fedbook: Lao Red Cross.

Website:  laoredcross.org.la